ABŞ-da
Missisipi çayının daşma təhlükəsi yaranıb. Daşqının qarşısını almaq
üçün Amerika hərbçiləri Missisipi çayının şlüzlərini açmağa
başlayıblar. Artıq Luiziana ştatında yerləşən Morqanza bəndi açılıb.
ABŞ ordusunun mühəndis korpusunun nümayəndələri bəndin nəzarət altında
saxlandığını və oradan suyun tədricən boşaldılacağını bildirirlər.
İri şəhərlərdə daşqının qarşısını almaq məqsədilə görülən tədbir bir
neçə həftəliyə 8000 kvadrat kilometr ərazini su altında qoysa da, Yeni
Orlean, Baton-Ruc kimi iri şəhərlərdə daşqın olmayacaq. Region
rəhbərliyi artıq 25 minə yaxın adam üçün müvəqqəti sığınacaq da
hazırlayıb. Buraya Morqanza bəndinin açılması ilə əlaqədar öz evini
tərk edən sakinlər yerləşdirilir.
Qeyd edək ki, ABŞ-ın mərkəzi hissəsində son 70 ilin ən güclü daşqını
leysan yağışların və qar əriməsinin nəticəsidir. Su səviyyəsinin
artdığı Missisipi çayının bəndləri isə axırıncı dəfə 1973-cü ildə
açılıb.