Sosial şəbəkələr sırasına "Quql+” (Google+) da qatıldıqdan sonra mütəxəssislər bir məsələ ətrafında fikir mübadiləsi aparırlar: "Quql+” "Feysbuk”la (Facebook) mübarizə apara biləcəkmi? Yeni şəbəkə "Feysbuk”u taxtdan sala biləcəkmi?

Məlum olduğu kimi, hazırda sosial şəbəkələr arasında liderlik "Feysbuk”a məxsusdur. Ötən il bu sosial şəbəkədən istifadə edənlərin sayı 500 milyon idisə, indi bu rəqəmin 750 milyona çatdığı və bu şəbəkənin istifadəçilərinin sayının hər saniyə artdığı bildirilir. Belə bir şəraitdə "Quql+”un uğur qazanıb-qazanmayacağı ciddi suallar doğurur.

"Quql+” bir çox məsələlərdə "Feysbuk”u özünə nümunə götürüb. Belə ki, "Quql+” vasitəsilə də interaktiv mesaj göndərmək, ani ünsiyyət qurmaq, şəbəkəyə foto yükləmək və digər işləri görmək mümkündür.

Mütəxəssislərin fikrincə, "Feysbuk”un genişlənməsi və bugünkü vəziyyətə çatması "Quql+”un işini çətinləşdirsə də, yeni sosial şəbəkənin arxasında "Quql” kimi nəhəng firmanın dayanması mübarizənin başabaş gedəcəyini proqnozlaşdırmağa imkan verir.

Digər tərəfdən, "Mayspeys” (Myspace) nümunəsi "Quql+” haqqında optimist olmağa imkan verir. Məlumdur ki, "Mayspeys” bir vaxtlar sosial şəbəkələr siyahısında genişliyinə görə ilk sırada idi. Ancaq "Feysbuk” sonradan ortaya çıxsa da, o, "Mayspeys”i çox-çox geridə qoya bildi. İndi mütəxəssislər "Quql+”un da eyni uğura nail ola biləcəyini real sayırlar.

Təbii ki, bu mübarizədə kimin qalib gələcəyini zaman göstərəcək. Virtual məkanın aktivliyi bir çox hallarda proqnozlaşdırmanı mümkünsüzləşdirir.