Dünya ölkələrində mövsüm üçün anomal hava şəraiti hökm sürür. Fransada Alp dağlarında isə yay üçün nadir hal olan qar yağıb. Gözlənilməz çovğun Tur-de-Frans yarışlarının növbəti mərhələsinin keçirilməsini sual altında qoyub.

İspaniya istidən meydana gəlmiş meşə yanğınları ilə mübarizə aparır. Yanğın yaşayış məntəqələri üçün təhlükə törədir, nəqliyyatın hərəkətində fasilələr yaranıb. Kataloniya bölgəsində tüğyan edən meşə yanğınları və küləyin istiqamətini tez-tez dəyişməsi ilə əlaqədar gah evakuasiya elan olunur, gah da elan geri götürülür.

Polşada isə ildırım çaxması və güclü külək problemlər yaradıb. Sel nəticəsində əkin sahələrini su basıb, külək ağacları aşırıb. Ölkədə qasırğa və dolu proqnozlaşdırılıb.

Təbii fəlakətlər dünyanın ən günəşli ölkələrindən olan Avstraliyadan da yan keçməyib. Sidney şəhərində son iki sutka ərzində aylıq yağıntı norması düşüb. Ölkədə son 20 ildə görülməmiş pis hava şəraiti hökm sürür.

Kanadanın Monreal şəhərində isə leysan yağışlar əsl qeyzer effekti yaradıb. Belə ki, kanalizasiya quyusunun fontan vurması avtomobilini onun üzərində saxlamış sürücü üçün əsl fəlakətə çevrilib. Avtomobil bir neçə dəqiqə su şırnağının üstündə balansı qoruyaraq, yerə çırpılıb və əzilib.