Yaponiyanın şimal-şərqindəki Honsyu adasının şərq sahilində Rixter şkalası üzrə 6.2 bal gücündə zəlzələ olub. Yeraltı təkanın episentri Fukusimadan 93 kilometr cənub-şərqdə yerin 37 kilometr dərinliyində qeydə alınıb. Sahilyanı ərazidə köhnə tikilidə qalan üç balıqçının öldüyü xəbər verilir. Milli meteorologiya agentliyi əvvəlcə sunami təhlükəsi barədə xəbərdarlıq etsə də, bir neçə dəqiqədən sonra bu xəbərdarlıq ləğv edilib. Yaponiyanın 47 prefekturasından 17-də, o cümlədən paytaxt Tokioda yeraltı təkanı hiss edilib.

Bu, bir həftə ərzində 5-ci zəlzələdir. Xatırladaq ki, martın 11-də Yaponiyada 8.9 bal gücündə baş vermiş güclü zəlzələ dağıdıcı sunamiyə səbəb olmuşdu. 15 minədək insan ölmüş, 10 minədək isə itkin düşmüşdü.